Willkommen auf der Moritzfelder Tratschbank.

Tratschbank Autor Johann Salm

Beitrag 1 - Beitrag 2 - Beitrag 3 - Beitrag 4 - Beitrag 5 - Beitrag 6 - Beitrag 7 (neu) - Beitrag 8 (neu)

7. Beitrag:

FORTSETZUNG vun dr TRATSCHBANG !

Es is schun lang her,wu ich es letschi mol etwas iwer unser scheenes un ach unvergesliches Moritzfeld,gschrtieb,han awer wie es doch ach im Märchen un von alli anre Verzählunge heest „ES WAR EENMOL „So kann mr ach vun deem  was schun lang pasiert is,saan.Un in wirklichkeit,is des  - was ich too verzähle will oder besser gsat schreiwe mecht,des is jo ach schun vor so langer Zeit pasiert,das mr sich fascht nimmer dran errinre kann,un grad deshalb mecht ich des ufschreiwe,um es net zu vergesse.


Mir alte Moitzfelder wisse jo noch ganz genau,wie glei no dem Umsturz-ich men,vun dem Politische umtrehe vun dr Regierung vun Bukarest,am 22-23 August l944,was dann alles pasiert is. Zuerscht die FLUCHT,die Angscht vor de Russischer Armee.Viele vun unsre Landsleit,han aller Hals iwer Kopp ufginn un sinn mit Kind un Kegel,mitm Pherdewaan un ach zu Fuss,iwer die Kornesch un des Phafetal,uf Grosscham – Weiskerch-,Werschetz,dort war noch een grosii deitsche Armee Einheit gflicht ,in dr Hoffnung das se des richtiche gemach han.Ach ich han mei Kupfer schun  vertich gepackt ,vor mit unsrem Nochber seim Waan,loszufahre.Er hat een gutes Gschpan ghat,ich menn gute Pherd ach een grosse Waan,to han git zehn Leit druf gepasst (un soviel ware mr ach)Um zwölf Unr nachts,han mr im Plan khat,los zu fahre.Unser Nochper iwr die Gass,hat schun domols so een kleeneRADIO REKORDER;ghat un hat noch jedi Stund die Nachrichte vum Werschetzer Sender gheert.Um elf Uhr sin ich noomol schnel,iwr die Gass zu ihne gan um zu heehre ob noch alles in Ordnung is mit dr Abfahrt .Un wie ich uf die Gass khum sin,han ich so een brume un schepre ghert,des war een bissl unheemlich.To sinn ich gschwind rin in de Hof-han an die Tier gekloppt un dem Herr Schlattner gsat was sich to drause  tun täett .Er hat glei sei schwartze Umhenger khol  is rinklschlupt un fort war er. Um nozuschaue was too traus los is.Noo een phar Minute isr ach schun zruck kumm un hat nor gsaat :aus mitm Flichte,die Russe sin too „!“Ob die Situation vor mich un ich glaab vor vieli vun uns deitsche jugentliche,domols un ach nooher,vum Vorteil oder Noohteil war,des kann ich netmol heint,noo iwer sechzich Johr,noch immer net beurteile,de Grund wer ich eich etwas schpätr, verroode.Des is am ll September l944 passiert.Een phar täch truf,war dann in Moritzfeld een ganzes Regiment-motorisierte-russische Truppe,stationiert.Im Kaiser-wertshaus,war die Kuchl vun dere Einheit ingericht,die Autos mit ihre SCHRECKWAFFEN,die KATIUSCHAS,ware in unseren Bauernhöfe unergeprung-un meischtens in solche Heuser wo viel Beem ware,das mr se net vun dr Luft aus so richtich gsiehn hat ghene.Ach mir hann im Hof trei grosse Maulbirebeem stehn ghat un selbstverständlich ach zww  Studebe-ckerautos mit je eener KATIUSCHA,natierlich ach mit dem drzugehörigem personal,zwölf  Mann un eem Komandant,es war een sergent Vasia –Vasile .Am anfang war die Angscht riesich gross,awer es hat sich rausgschtelt das alli treizehn Soldate wirklich hoch anständichi Mensche ware un das mir uns ganz gut verstan han,wan mr ach net dem anre sei Schproch  un die ach net unsri, rede un verschteen han khene.


Ich jedenfalls han mich mit deni treizehn Soldate prime verschtan,sin uf deni Autos mit irer Geheim Waffen rumgekrawelt,genauso wie im Hambar mit meim Schpielzeich un der Vasia hat sich ach noch mit mir gschpielt- nor de Schlissl hat er fescht um de Hals gepun khat, wie so een richtiches Heilichtum .       
Mei Eltre,han bei ihrem Ankumme,glei wille platz im Zimmer vor die Soldate mache ,awer dr Sergent,dr Vasia hat gsat „Niet niet –nein,nein „un mitr Hand hatr dan uf die Kellertier gewies ( dort han mir unser Summerkuchl khat ) un hat gemennt „ sdies –hier-spaweit soldati-(hier schlafen die Soldaten )“Weil mir doch keen Radio khat han,Zeitunge ware ach keeni zu grien,un wan ach jemande een Radio hat khat,der hat sich doch net  getraut zu horche un so war ich halt een Person die wu noch ab un zu etwas Neies,vun dr Aussewelt durch mei ru-ssische Kumpels khert han.Manchmol is ach noch mei Freind,vun iwer dr Gass,des war een Basarabischer Flichtling,der hat ziemlich gut russisch verstan,zu uns kum un dan han mir mit deni Russe geplaudert,Witze gemach,un ach een pissl iwer die Front gered un noo eener Wuch ware mir so richtiche Freinde.,too war nix vun Feindschaft,nix vun Hass zugschpiere ,nee des ware ach so arme,unschuldiche Mensche wie mir alli zu deri domolichi Zeit .In deri ganzi Zeit,wu die Russe too im Dorf ware ,hat es plos een enziches mol so een Art Unfall gin ,bei dem is dr Holzhändlersch Vetr Andres ums lewe khum un des ganzi nor weger eem Kruch Wein .Das des grad den Mann getroff hat der wu doch immer so een guti Meinung iwer die Russe khat hat ,is wirklich schaat – die ganzi Zeit vor deni ihre Ankunft in Moritzfeld hat er nor gutes iwer sie verzählt un des aus eigener Erfahrung weil er war jo im erschte Weltkriech in russischer Gfangeschaft ,hat ach noch  phar Worte russisch rede khene ,des hat ihm awer nix gholf ,weil ewe der Soldat vun dem ganze nix gewiss hat un in seim Kopp nor Wodka trin war ,awer net genuch .Dr Vetr  Andres hat awer gement es wär schun genuch vor heint,hat de Keller mitm Wein abschpert un wollt in die Wohnung gen un too hat der Russ een Handgranat aus seim Stiewel khol un die is dan hinrem Vetr Andres explodiert .Soviel hat mr dan noch ghert  dass der Soldat glei an die Front gschickt is gin.- Die Soldate –eigentlich des ganzi Regiment war so ungefähr 12 – 15 Täch im Dorf bis es uf eenmol ALARM gin hat dan hats net länger wie zwoo Stund getauert un die motorisierti Ein-heit is Richtung Gataia los gfahr – der Sergent,dr Vasia hat mir noch ins Ohr gsaat das es in Werschetz un Deta zum Kampf khum is .Gejer Owed hat mer dan ach ziemlich lautes schiese ghert,Kanone un ach soo een schnellfeier,des misse die Katiuschas gewähn sin .Noo dem Abzuch vun deri motorisierti Einheit sin nor mehr vereinzelte Truppenteile durchs Dorf  gfar.Wie es weider an dr Front zugan is,han mir nix mehr ghert,Radio horche war streng verbott,falsche Nachrichte zu verzähle is mit Gfängnis gschtroft gin un to han mir halt nor schpekuliere khene wie un was noch uf uns zukhume wert.Des will ich noch erwähne das so Mitte Oktower ,wie ich uf Temeschwar mit meiner Schwägerin gfar sin, un vum Bahnhof in die Strassnbahn insschtei to hat uf eenmol jemand geruf :“ heei Hansu „ un wen han ich gsin. Es war der Sergent dr Vasia mit eem Verbant am Kopp un dr  linki Arm angewickelt .Ich war froh –er ach  un saat un weist mit seiner Hand „fsie (alli )kaput ,samo ja i Lioscha ozlediti i niet mertav ;(nur ich und Lioscha sint am lewe nor verwund )Mir ware alli zwaa froh das mr uns getrof un gsien han – awer sunscht han ich nixmehr vun deni Kumpels khert..Die Wintermonate sin dan so langsam voriwer gan , awer grosse Sorje han mir alli khat,iwerhaupt unsre Eltern weil mr jo nix mehr ghert han von unsre Angehöriche Leit die was an dr Front ware un ach vun deni vieli Flichtlinge ,die han doch iwer des damoliche Jugoslavien fahre misse un dort han doch die Partizane alli zamgschlacht un zamgschoss ,was deitsch war oder nor so ausgschaut hat .Fascht een jede Tach hat mr verschiede greuliche Sache von der Gegend ghert,vieles war jo net wohr awer mir hat sich halt immer Sorje gemach.


Korz vor Weihnachte hat es sich rum gschproch das een grosser Teel vun junge un gsunde Leit aus Rumänien ,zu Zwangsarweit uf Russland gschickt soll gin –eenmol hats ghees nor mir deitsche –dan een anresmol ach Ungare un Rumäner ,dan hats wieder mol ghees das nor staatsfeindliche Elemente  zamm –gsamelt wäre vor ins Konzetrationslager .Vun dene sin jo schun een phar glei noo dem Umsturz verhaft gin un uf Tirgu Jiu,Rämnicul Sarat un Jilava in die K.lagre ingschpert gin. Jedenfalls vor die Jugent hats khe Spass mehr gin,kheen Tanzunerhaltung,nix war mehr mit  Maie gehen ,die Gasse ware wie noo eem grosse Unwetr,leer wie wan alles ausgschtorp wer.Ab un zu sin mir noch in de Schenolacke gan Schlitschuh laafe .Es letschi mol ware mr,so ungefähr zwölf bis fufzehn Buwe un Mädle im Jänner an eem Suntach (ich glab es war dr l4 )un too han mir gsiehn wie dort uf dr Stroos gejer Ghertinisch un ach in de Kleegärter gejer die Bahn ,phar Soldate rumschpaziert sin ,awer mir han uns deshalb khe Sorje gemach .Wie ich des dan drhem meine Eltre gsaat han ,sin die ganz nervös gin un gemennt ;also is es doch wohr das se uns jetz zammtreiwe wäre vor uns uf Russland schicke  Un so is des ach khum –am nächste Tach es war noch dunkl,is dr Trummlmann im Dorf rumgan un hat ;“ allen Leuten zur Kentnis gebracht ;“dass alli Bewohner ,die Weiwer vun l8 bis 4O Johr un die Männer vun l7 bis 45 Johr ,mit Winterwäsch un Verpflugung vor 14 Täch ,bis um 12 Uhr,im Schulhof misse sin.Wer dere Verortnung net Folge leischtet ,wert verhaft un vors Kriegsgericht geprung.Weil ich jo noch net l7 Johr alt war sin ich ach net dort hin gan –awer des hat mir nix genizt weil am nächste Tach in dr Frieh ,war een rumänischer ,een russischer Soldat un dr Trummlmann( des war dr Schulda )vor unsrem Tierl gschtan un han gsat ich muss ach mitkhumme ich fall ach in die ALTERSGRUPPE vun l7 Johr aufwertz,rin .Weil ich doch nix gericht han khat –khe Kupfer gepackt  -khe Esse vorbereit  ingepackt han khat, han die trei HERREN mir bis een Uhr erlaubt vor mich zu presendiere.Na ja un so sin ich dan ach in die Reih vun deni Grossi Männer khum –mir junge Buwe vum 28 Johrgang –han misse im Platz vun anre , die wu sich rauskhaaft han oder zu eem anre einflussreiche Geschlächt ghert han ,des Loch ausfille.Am nächste Tach,des war dr l7 Jänner sin mir dan mit Laschtautos uf Gataia gfiert gin,han dort noch een Nacht verprung –gschlof han mr im Wertshaus newer dem Bahn -hof –beim Kapornyai .Am owet is dan zufälich een rusischer Maior zu uns khum –ere hat een phar Worte deisch rede khene –ich sin dan zu ihm gan und han ne gfrot ob ach mir junge Buwe too mit fahre misse ?mir sin doch noch net l7 Johr . Na skolko Jahre du bist ? hat er mich gfrot un wie ich ihm gsaat han das ich un noch anre ach erscht  l6 Johr alt sin  ,dan saat er ich  soll „mache ein Pumacha (Papier –eine Liste )vun allen : er hats gsaat –ich hans gemach un in derselwi Nacht han mir unsre Sache zumgephackt un sin Richtung Moritzfeld marschiert –wie ich mich noch errinre khan ware mer unser acht Persona vun meim Johrgang war noch dr Löffler,Toht ,Kortik alles Phedre,dan Mengay Hans, un ich.Selbstverständlich war die Freit gros bei unsre Angehörigen doch leider net vun langer Dauer ,weil die vun dr Gemeinde bestimmti Zahl,war noch net komplekt un to han halt  noch anre ufgschnapt un zamgfang were misse vor die ZAHL ZU KOMPLEKTIERE ,un soo sin halt ich un ach noch die anre Buwe ,die wo vor een phar Täch noch freie LAUF griet han ,an die REIH khum Der rusischi Maior vun domols war niemmer zuständich –des misse die HERRE vun unsrem Gemeindehaus gewisst han –un weil (des is mei persöhnlichi Mei – nung ,un sollt es net richtich sin so bitt ich um Entschultigung bei deni betrefendi Persone ) se ihre eigene Kinner un Vewante verschoone han wille ,hat mr halt uns in dene ihrem Platz gschickt .Na ja un am 27 Jänner l945 han mir halt unser URLAUBSREISE abgebucht un sin Richtung Russland gfahr wu ich un noch vieli anre fascht fünf Johr vun unsrer scheeni Jugenszeit verprung han. Wie es dort war mecht ich jetz net verzähle –iwer des ganzi drum un dran is jo schun so viel gschrieb gin –wohres un manchmol ach unwohres,awer um des ganzi  zu verstähn muss mr mol so etwas persöhnlich mitmache,hauptsach is das ich des iwerlebt han un ach noch too sin .Nor eens mecht ich noch erwähne ; ver zeihe kann dr Mensch viel awer vergesse kann mr  so etwas  niemols !! Un noch etwas han ich gelernt –ich han des jo schun am Anfang erwähnt wie  ich vun dr Flucht vor de Russe gschrieb han ;seim Schicksal khan mr net entrinne nor wees mr net immer wie mr des am beschte mache khan –domols han ich mei grossi REISE net Richtung Westen mache kenne un jetz han ich se MISSE Rich tung Osten mache –wie es besser wahr des wees nor unser Herrgott awer ach IHM khan ich es verdanke das ich noch too uner Eich sin –


Awer wie es halt im Lewe schun immer war un ach heint noch so is :een Unglick kummt seltens alenich,so war es ach domols vor sechzich Johr. .Mir wahre noch net in Russland ankhum,to hat mr schun drhem angfankt mit anre schikane gejer die deitschi Bevölkerung : es war die Enteignung vun Haus un Ackerland – es liebschti un ach wichtigschti GUT vor un vun unsre Angehö –riche ,vor des was unsre Anhne un Uhrahne ihr ganzes Lewelang gschuft un ge-rackert han ,vor hunerte vor Johre ihre alti Heimat ufgin han – des alles hat mr deni Mensche so ganz einfach wegkhol .Noo meiner Ansicht war des dr Anfang vun unsrem End – vun unsrem VERBLEIB im Banat un ach in Siebenbürgen Adei heissgeliebti Heimat – adei du mei scheenes Schwoweland ,han dan dr Reih noo,vieli vun unsre Landsleit gsaat .

 

Un so is dan ens nohm anre khum – am 5 März l945 des grossi  Agrar Reformgesez ( ach noch Doctor Petru Grosa Gesez gennent ) to hat mr dann alli Grossbaure enteignet un deni ihr Feld an die rumänischi Bevölkerung ufge-teelt,awer drbei hat die Regierung net gedenkt das doch dr greschti teel vun deni die wu des Feld griet han,gar khe Ahnung vum Ackerbau han –ach khen Phert un Waan  un ach khe Landwertschaftliche Geräte khat han – haupsach war awer das ach jetz alle arme Mensche in dem Land Besietzer vun Grund un Boden ware .Des Feld was net ufgeteelt is gin hat mr em Staatliche Ackerbau Unter-nehme zugeteelt – awer wie halt aller Anfang schwer is so war es ach mit dere Landwertschaft .Jo un vun jetz an han unsre Baure ,die wu bis tohin ihr Eigen-tum selwer verarweit han ,die ware jetz Knechte uf ihrer eigenen SCHOLLE Arweits Not war trotzdem kheni –weil doch khe Arweitskraft im Dorf  war ,die war doch verschlept un im Kriech (des ware so ungefähr 6OO bis 65O Persone )

 

Dan in Iunie l946 war die VERSTAATLICHUNG vun der gesammten Industrie un Grosshandel – des eeni gute an dem war dass phar Mensche dorch des arweit griet han (ich men drmit die Baure deni wu mr des Feld wegkholt hat die sin dan uf Bokschan oder Reschitz mitm Zug gfahr un han in dr Fabrik gearweit.Dan im dezember l947 ,too ware schun die Wahle gewän un Rumänien hat vor de Kommunismus abgschtimmt –hat dr Könich Michael der I ,abdanke misse un ach es Land verlosse misse – er hat ganz eenfach khe anri Wahl khat ! Un so is ens noo dem anre ,Schlag uf Schlag gang un immer nor Schlechtes. Die Ministre un anri funktions Persone sin gewechselt gin bis nor mehr un nor Kommuniste,in dr Regierung un in führenden Posten ware.            


Im Herbscht l949 sin dan ach noch die Kleengewerb un Gschäftsleit enteignet gin un die hat mr dan in HANDELS un GEWERBE GENOSSEN - SCHAFTEN umgewandlt ,Die gewesene Eigentümmer han awer nor BEDINGT noch in dere Genossenschaft arweite derfe .,weil mr Ängschter hat khat dass die Sabotaje treiwe khennte – (als ob die ihr eigen Ufgebautes vernichte meechte ) Inzwische ware schun viel vun deni Soldate du wu beim deitsche un rumänische Militär gedient han un net in Gfangenschaft geroot sin,drhem ankhum,ach vun Russland sin ab Oktower,transporte mit deni Verschlepte – Deportierte,ankhum un es Lewe im Dorf hat sich angfang zu normalisiere ( wan mr des so nenne  het khene noo al dem pasierte )Es war jo fascht kheen Haus des wu niemande verlor hat- insgesammt sin in Russland un an dr Front l48 Persoane ums Lewe khum drfun 66 bei deri ZWANGSARWEIT in Russland des sin fascht 26 % vun deni Verschlepte .Es schenschti war awer dass noch viel vun deni junge Leit,die was an dr Front ware oder in Russland dan ach noch zum Militär,also inricke han misse –awer net vor Militärischi Ausbildung sonder vor Arweide un des hat ach wieder trei Johr getauert –( uner dene war ach ic)des war wirklich een harti Schtrof  un mir han doch in unsrem ganze junge Lewe nix verbroch ,nix gschtol un ach niemande umgebrung mir sin gschtroft gin nor aus dem Grund weil unsre Mottre uns als DEITSCHE uf die Welt geprunk han.

 

Awer trotz all dem was mir han misse mitmache ,mir sin deitsch un ach erliche un ufrichtiche Mensche geblieb un ware immer vun unsre Mitmensche ob des Rumänre,Ungare,Serwe ware ,sogar vun de Jude ,geehrt un reschpektiert gin dort im Banat un ach in ganz Rumänien,un ich men un winsch das des ach immer so bleiwe werd .

 

Un jetzt bleibt alli gsund – Servus un Adjei bis zum nächste mol saat un
griest Eich alli        
 

Em Haniklsklos sei HANS  !!

 

weiter zu Beitrag Nr.8