Also glei am Onfang muß ich eich son, daß die neiji Technik schun was großortiches is. Und das och schun die kleene Kiner mit dem ganze drum un rum zurechtkumme und sokor uns ältre Mensche lerne kenne wie des alles funktioniert un wie mer in der ganzi Welt rum schlurfe kann, des find ich fowelhaft.
Ja, un wenn des halt net so wär, het ich och wahrscheinlich in der kleeni Flimmerkischt ( eigentlich heest des Ding jo Komputter ) nix iwer unser scheenes Moritzfeld ghert und gsien. Es is m´r net zum klowe kum daß mer do Bildr ( die Kerch, Schul, Station usw.)gsieht, genau wie in Wirklichkeit un noch viel anre Sache vun un iwer Moritzfeld. Jo, jo schaut nor mal ach do nin, des Internetz des is was ganz besonderes - vielleicht net for alli Landsleit - bestimmt awer for Moritzfelder die so manchesmol noch a bissl Hemweh han. Drum so ich o een ufrichtiges Dankscheen an all die, die des alles zammgstellt han, ( die Hompeitsch oder wie des schun heest) die ganze Date un alles drum un dran, do nin getippt un damit och ihre Freizeit ufgeopfert han. For Alli a Lob un macht so weiter.
Un wie ich so iwer des Ganzi do nodenk, wie gschwind m`r in der grossi Welt doch eener vum anri was here kann , anstatt a Brief der wuchelang unerwegs war - heint geht des mit de email oder anstatt Telegrom enfach a SMS (ich men des heest, Sei-Mol-Schnell ) do is mir ach de Gedanke kum : Mensch Hans, do kennscht doch och was nin schreiwe, un dann kann die ganzi Welt, die was im Internet www.moritzfeld.de tippe un dann mit der Maus rumfuchtle tun, des Alles lese.
Und wann des dann dene Leser g`falle tet, kenne se zurucktippe : O.K. es is gut Hans mach weiter, oder kenne och son " nee so a Quatsch, is nix for uns " na ja dann ganz eenfach a Mausklick un alles is verschwun. Das in Moritzfeld ehrliche, fleißiche un luschtiche Leit ware, des wes ja a jeder. Georweit han die meischte vun frieh morjets bis spot am owed, awer daß m`r do mol ghert hat dass sie, gstresst sin, des hat sich net gen. In die Disco sin die junge Leit o net gang awer an fascht jedem Samschtag owed war im Wertshaus Bohl weil guti Musikante, han die Moritzfelder jo immer khat. Un ausserdem hat`s jo och noch die Kortepartije gin - Ultifange - Schnappsle - Mariasch un manchmol Eenunzwanzich , derzu a Spritzer oder a Raki. Es is ach mal vorkum das m`r jemand ins Gschäft gschikt hat, vor um a Lei, a Dezi "Spennodelsaft" zu koofe , Witzbolde hat`s viel ghen in unsrem Moritzfeld. So war des och mit dene vier Kortespieler die wu fascht jede Owed im " Kaiserwertshaus " de Ulti gfang han. Des war de Lehrer, de Apotheker , de Parre und de Vedr Pheder (des war de Direktor vun d`r Baurebank).
An em Suntach Owed wie se so richtig im Spielfiewer wore, steht der Vedr Pheder uf un soot : " Jesus no, ich muss jo hem weil ich in der frieh um finwi, uf Temeschwar, zu ener Schedintza fahre muss ". Da ment de Apotheker : " Du Pheder, ich han do a Pakl mit Medikamente, vor a Freind vun mir, der wu krank is, dedscht du des net mithole ? Der wohnt an der Bank wu du Schedintza hascht, um`s Eck. Ich geh och klei hem un mach`s fertig , un in der Frieh - du gescht jo sowieso bei mir langscht - klopp am Fenster un hol`s ab. Ich schreib die Adress noch druf, gib`s awer Bittscheen nor perseenlich ab, denn Du griescht vun dem Herr 500 Lei. Morje Owed treffe mir uns dann wieder do im Wertshaus." De Vedr Pheder holt in der Frieh des Pakl ab, de Zug kummt pinktlich in Temeschwar an, un weil noch Zeit war bis zu der Schedintza, is er och gleich gang des abzugin. Er find och gleich die Hausnummer, een großes vierstöckiges Haus, er sucht den Name uf dem Tierschild , awer er is net zu finde. No der Schedintza is er nochmal dorthin gang awer desmol rum vun Stock zu Stock un hat a an por Tiere gekloppt un no dem Xaver Karl gfroot ( so hat`s uf`m Pakl drufgstan) awer kenner hat ne gekennt. So is halt unser Vedr Pheder am Owed wieder hemgfor un glei ins Wertshaus ghang, dem Apotheker des Pakl auf de Tisch gworf un gsoot er soll es nächschte mol die Adress richtig un genau drufschreiwe und hat natierlich oa a bissl gschent, weil er damit soviel rum hat loofe misse. Na was vor wichtiche Medikamente sin do drin, han die anre dann gfroot ? " Uffbaumittel vor Sportler, die sind for alli gut, niedemohl em Vedr Pheder han se gschadt" hat de Apotheker ghsat. Do wore dann alli Leit im Wertshaus glei neigirich, wie soo Medikamente ausschaue, und des Phakl hat ufgemacht were misse. Langsam han se`s dann ufgemach, een Schachtel in der anri , dann scheenes Packpapier, dann in eener Zeidung des " Uffbaumittel" , a große roode Ziegelsteen. Un genau soo rot wie der, is och de Vedr Pheder angeloff. Gsod hat er jo nix mehr, des han schun die anre gemach. Wie des Sprichwort schun soot: " Wer de Schode hat brauch sich, um de Spott, net zu kimmre". Un wie die Ganzi Bude so tobt un lacht schreit de Vedr Pheder : " Ruhe ! Kasper ! (so hat de Wirt ghees) A Runde uf mei Konto, for Alli un du Medikamentepuscher, pass uf, des zahl ich dir schun noch zuruck. Awer dann muscht du die Runde zohle." Un wie sich de Vedr Pheder rewanschiert hat , des verzähl ich eich es nächschti mol.

Un jetzt Servus, bleibt gsund

A scheene Gruß, vum Hanikels Klos seim HANS

weiter zu Beitrag Nr.2