morGrüß Gott liebe Moritzfelder,

Es is schun ziemlich lang her dass ich etwas vun unsrem scheeene Dorf gschrieb han. Ich han awer gemennt dass och noch anre Kumpels etwas zu verzähle han und sich zu uns uf die Tratschbank gsitzt hädde und vor die Junge un och die Alte vun unsrem scheene un luschtiche Moritzfeld verzählt/ufgschrieb oder ringetippt hädde, sodass och noch unsre Enkel oder Urenkel gsihn hedde wie es in unsre alter Heimat wor.
Na ja, was noch net is kann jo noch kumme ?!!
Also wie ich eich es letschti mol - oder es erschti mol versproch han - mecht ich eich heint verrode wie de Veder Peder sich beim Apotheker revanciert hat. Des war ja schun im Summer wie der Veder Peder des Ufbaumittel vor Sportler in Temeschwar rumgschleppt hat un derbei och richtig ins Schwitze kum is. Inzwische sin ja schun poor Monate vergang, die Trauwe ware och schun geles un der Neie, oder wie mer to in Deitschland saat de "Federweisse" war och schun apetitanregend un hat och de Dorscht gut gstillt - eigentlich saat mer ja im Banat Rambasch dazu.
Un wisst dir och vun wu des Wort Rambasch herkummt ? : Ne des wisse viel net, awer ich wills eich saan. Weil im Herbscht die Feldorweit schun zu End is, die meischte Leit dann och derhemm sin und um die Zeit die Hausierer un die Bettler dorch die Derfer streife um ihre Gschäfte zu mache, do is an eem scheene Herbstowed der Michl un sei Ortack der Ion in een Baurehaus kumm, wu grod der Bauer mit dene ausgepresste Trauwe georweit hat. Wie die Zwo des gsiehn han - vum Keller is och so a gude Duft no Moscht rufkumm - do han sie och gleich a große Dorscht grieht un de Hausherr gebitt er soll ne doch so een Dippe vun dem heiriche ghin.
Zuerscht trinkt de Schwob de Michl en kräftige Schluck, wischt sei Schnauzer ab un saat:
" Mei Gott is der gut wie RAAHM", danach trinkt de Ion stellt de Dippe hin un saat :
" Basch!" (zu Deitsch = genauso/ebenso) seit domols heest der Federweisse im Banat Rambasch.
Awer ich will Eich ja net iwer de Rambasch sonder iwer de Veder Peder verzähle.
An eem Samschtach Morjed ruft de Veder Peder sei Laufbursch de Sepp, gibt ihm en brauni Pill - die wor so groß wie en Kerschekeere - in eener Reibholzschachtel un saat zu ihm:
" Sepp laaf mol schnell in die Apothek un frog den Apotheker for was die Pill do is, weil ich jo immer jede Morjed 3 Pille, eeni for de hohe Blutdruck eeni for`s Herz un eeni for mei Moweh, schlucke muss un nor die noch iwrich geblieb is".
De Sepp laaft zum Apotheker mit dere Pill un saat was er zu saan hat ghat. De Apotheker schaut sie an, schmeckt un leckt dron, vergleicht se mit anre Medikamente awer kann em Sepp nix ausrichte un saat zu ihm: " Geh mal heim zu deinem Direktor ich muss die Pille noch ins Labor zum analysieren senden und er soll heute Abend zum Kartenspiel die Verpackung - Ambalaj - mitbringen".
De Sepp kummt in die Bank zuruck richtet des seim Direktor aus, awer der gibt ihm gleich en Lischt mit der ganzi Bankkundschaft dass er sie for heint Owed um sieweni ins Kaiserwertshaus insaan soll un alli unbedingt kumme solle, weil was wichtiges mitzuteele is.
Punkt sieweni, es hat grod Gebet geleit war de Lesesaal vum Wertshaus angfillt mit Leit.
De Pfarre, de Lehrer ,de Veder Peder han och schun am Stammtisch gsitzt un die Korte gschtichelt, nor de Apotheker hat noch gfehlt weil er erscht um sieweni zusperrt. Als der dann ankumm is hat große Aue gemach weil so viel Leit dort ware hat sich dabei awer nichts schlechtes gedenkt. Kaum hat er gsitzt frogt och schun der Veder Peder was er mit dere Pill rausgfun hat. Dazu saat der Apotheker : " Sag mal Peter von wem hast Du dieses Medikament gekauft und zeige mir mal bitte die Verpackung, denn nach meinen Analysen ist dies kein Arzneimittel, sondern was menschliches"( de Herr Arpad de Apotheker, war een Herrischer).
De Veder Peder kneppelt sei Rock uf holt die Verpackung raus, leet se uf de Tisch, un saat :
" Do drin han ich die Pill gischter morjed gfun". Zuerscht war alles mausestill, alli han nor groß uf de Tisch un uf die Verpackung gschaut , uf eenmol han alli angfang zu lache, zu schreie, weil des - Ambalaj - war em Veder Peder sei Gatjerhoss. Na ja un wer de Schode hat der brauch sich um de Spott net zu sorje. De ganze Saal hat getobt nor de Herr Arpad war ganz ruhig, rot angeloff un hat dann ganz ernscht zum Veder Peder gsaat :" Du Lump, du Vagabund nun weiß ich auch weshalb die vielen Leute hier sind, hasst mich diesmal schön reingelegt aber kommt Zeit kommt Rat, schuldig bleibe ich es Dir nicht! "
Dann hat er de Wirt de Veder Kasper geruf, hat awer gar nichts mehr brauche zu bestelle weil der Wirt hat schun gewisst wie viel die Uhr gschlaa hat un is och gleich mit em Wein un Gläser kumm. De ULTI is an teem Owed nimmer gfang gin, awer a paar vun dene Ingelodene han sich en Rausch angetrunk, weil beim umesunscht trinke han die Moritzfelder immer schun gut un tief in die Flasch schaue kenne. Zuletscht hat de Phare-Batschi noch gemennt: " Leit unser Hergott hat gsaat Rache des is a grossi Todsind, awer zurucktun des derf mer und is ke Sind, darum muss de Peder och net Beichte kumme".
Etwas hat awer dem Apotheker ke Ruh geloss wieso er uf die menschliche Pille ringfall is un des net gleich bemerkt hat, drum hat er och de Veder Peder noch vor em hemgeen gfrot wie er des doch gemach hat. "Ganz eenfach" saat der Peder "no eem Rezept vun deim Kulleger, ich han die Pill mit Siropp ingschpritzt, dann Staabzucker drufgschtraut, drukle geloss un se dir zum analisiere gschickt . Ich glaab Sie hat dir sogor gut gschmeckt wie du ningebiss hascht !".
Ich menn for heint reichts widder weil ich wees das es noch viel luschtiche un wohre Gschichte aus unsrem Moritzfeld gibt, - drum Bitt scheen kummt un sitzt Eich och uf die Tratschbank und verzählt uns was dr wisst.
Ich sin sicher dass unser Enkelkinder - och wann mir nimmer do sin - sich iwer die Gschichte un Erzählunge aus unsrem Moritzfeld freie meechte.

Servus bis zum nächschte mol un en scheene Gruß an Eich alli vum
Hanikels Klos seim Hans

weiter zu Beitrag Nr.3